Nga data 5 korrik 2017, në Tetovë do të fillojë edicioni i pestë i festivalit “Vera e Kulturës Tetovare”. Dita e parë e këtij edicioni do të shënohet me aktivitete me rastin e ditës së pavarësisë së SHBA në Këndin Amerikan në Tetovë me fillim në ora 19:00.
Festivali “Vera e Kulturës Tetovare” tashmë është bërë traditë për qytetin e Tetovës dhe shënohet me aktivitete të ndryshme . Koncerte klasike dhe korale, teatër në rrugë, projeksione filmi, aktivitete sportive, rruga e ombrellave si dhe koncerte të yjeve muzikore janë vetëm një pjesë e përzgjedhjes artistike, që për vizitorët do të ofrojnë freski dhe emocione të pafund në këto netë të nxehta verore.
Edicioni i pestë i këtij festivali do të zgjasë 14 ditë, ku do të mbyllet me Ekspozitën me veprat e kolonisë ndërkombëtare të artistëve figurativ “Tetova 2017” dhe me Koncertin ESMA (European Summer Music Academy) më date 23 korrik 2017.
Ky festival organizohet nga ana e Komunës së Tetovës.
